學酒少走冤枉路：我學到 教到WSET第4級後才悟出4個捷徑
- Denver Leong
- 2月14日
- 讀畢需時 4 分鐘
已更新：2月15日
我讀到 MW Year 2（亦即可以教 WSET Level 4）嗰年，回頭睇返自己以前喺學酒上面用過嘅時間同錢：有一大部分其實可以唔洗使。
唔係因為我以前報錯課程就「冇用」，而係我後來先明白：學葡萄酒最貴嘅成本，唔係學費，而係「方向錯咗」。
「方向錯咗」時你會覺得愈學愈多、愈飲愈貴，但仍然講唔清楚自己飲緊乜、點解係咁。
如果你想學得實在，唔想只係考試技巧，呢篇你會好有幫助！先講重點：我覺得學酒要少走冤枉路，主要睇 4 樣（我會由「最核心」一路講到「最容易踩坑」）
老師有冇教你點樣諗（Why），唔係只教你寫到「有咩味」
揀老師要好似揀專科醫生
課堂節奏有冇設計過？工餘時間學習的人跟唔跟得上？
自己無系統亂買酒、睇網紅學
1) 老師有冇教你點樣諗（Why），唔係只教你寫到「有咩味」
以前我好相信「出名機構、名師」一定穩陣。上落堂先發現，有啲課堂節奏好趕，品酒好容易變成「填表式」：
你聞到咩？
你飲到咩？
寫落去
寫得出一堆字，好似好識；但下一次自己開支酒，仍然冇方向。因為你其實未有一套「由結構推理返原因」嘅方法，只係記錄咗當刻嘅感覺。
2012 年我上過 Cathy Van Zyl MW 嘅堂，佢有一句我到而家都用緊：
天氣凍 → 葡萄酒更清爽
天氣暖 → 果味更甜、更熟
呢類「邏輯」一入腦，你品酒就唔再靠估。你會知道入口第一時間應該留意乜、點樣由結構推返去氣候同工藝：品得更快、更準，亦更講得清楚。
學品酒捷徑一：
搵教得明「Why」嘅老師學。你一學識捉重點同推理，就可以自己一路練、一路揀酒，唔使不停報班同買堂去「補洞」。
咁問題就嚟喇：人人都話自己「教得好清楚」，但你點樣喺報名前分得出：邊個真係教到你一套可複製嘅思考方法，而唔係只係帶你填表？
2) 揀老師要好似揀專科醫生
葡萄酒世界太大（產區、氣候、品種、工藝、年份、風格），教得好唔係靠資歷堆砌，而係靠 系統 同 持續打磨更新。
好似 Jasper Morris MW 咁受尊重，就係因為佢用成個職涯深耕 Burgundy：專注得夠深，先帶到人少走彎路。揀老師同揀專科醫生一樣：重點唔係「乜都講得兩句」，而係「講得準、解釋得清楚」。
我亦遇過一啲只會幫你暫時「止痛」嘅教法，甚至教錯咗我啲核心邏輯，令我之後要花更多時間同金錢先拆解得返邊度錯。好嘅老師就相反：會幫你「斷症」，再連同工具、練習同重溫方法一齊交比你，令你學完可以自己一路進步。
學品酒捷徑二：
唔好盲目報晒所有課，以為大集匯就一定變得好識。與其花錢買一堆零碎知識，不如集中跟一位真正教得清、教到你識自己推理嘅老師，少走冤枉路。
但就算你揀啱咗人，都仲有個現實問題：返工人士最常失敗唔係因為唔夠叻，而係「跟唔到節奏」。所以第三點，其實係講「好老師，點樣先算教得啱你嘅生活節奏」。
3) 節奏有冇設計過？工餘時間上堂的同學唔跟得上？
返工人士最大難度好多時唔係冇天份，而係 專注力有限：一開始可能吸收到 100%，但當課堂太長、資訊太密，後段好容易跌到得返 60%。
所以我哋偏好嘅安排係：每堂約 3 小時、每星期一堂（必要時可長少少，但重點係要有消化位）。你有時間沉澱同練習，下一堂先接得穩，唔會上完堂感覺散唒。
另一個關鍵係：有冇後續支援？一星期後會唔會忘記唒。品酒唔係死背，係靠「理解 + 練習」累積。面授當刻要聽、要飲、要記，漏咗一兩部分好正常，所以我哋用影片做補位：可以回看、暫停、重播、加速，用自己節奏消化，理解反而更深。
因此 2023–2025 我哋寧願排少啲課，都要先做好影片；到 2026 年初已累積 130+ 段，部分放上 YouTube 亦吸引到海外觀眾。影片主要分兩類：
重溫：考試前按主題重播，補返唔明嗰段
應用：教你用知識去揀酒、買酒、配搭
學品酒捷徑三：
唔好用「灌水式」塞資訊去硬捱課時；改為揀一套因應你背景嘅節奏，再配合重溫同應用練習。你會更快打好底、喺任何情況下都識揀酒，亦自然少報冤枉課、少買錯酒。
講到呢度，你可能會話：「咁我唔報班得唔得？我自己買酒飲、睇片學，應該都得掛？」可以，但呢度就係最多人跌入去嘅第四個坑：自學唔係問題，無系統先係問題。
4) 自己無系統亂買酒、睇網紅學
好多人都會諗：「報課程嘅錢都夠我去旅行／飲幾餐好酒。」我完全理解。但葡萄酒有個現實：你會見到幾乎只有葡萄酒行業會有 侍酒師，而且做到好嘅人工唔低：因為佢哋靠嘅唔係背誦，而係一套經年訓練出嚟嘅「配搭與判斷技巧」，AI取代唔到。
酒同菜點夾、幾時開、用咩溫度同杯型、開邊個年份先最啱，全部都受廚師做法、年份狀態同酒嘅成熟度影響。呢啲細位唔係睇幾條片就穩陣，亦唔係靠「買多啲試錯」就一定識。
所以先會見到有人去自組酒局，成晚都講「呢支好有潛力」，但結果係開得太遲/ 狀態未到 / 飲到漏 / 飲到好可惜！
米芝蓮一直都好重視餐廳酒單同配搭體驗，亦係星級評定嘅其中一環；因此你都會留意到米芝蓮喺 2026 年新增 The Michelin Guide Wine Selection，並將之視為評級體系策略發展嘅一部分。
學品酒捷徑四：
唔好用「亂買酒試錯」當學費。你當然可以自學，但無系統咁試，試錯成本往往比跟一套專業方法學更貴、更慢。
如果你睇到呢度，都同意「方向」先係最貴嘅成本：咁你要做嘅其實唔係更努力地買更多酒、上更多堂，而係用一套可消化、可重溫、可應用嘅方法去學，令你每一次練習都有累積、每一筆支出都值得。
我哋只專注做 葡萄酒教學，設計以「工餘都吸收得到」為前提：重點清晰、節奏分層、配合影片重溫同應用練習，目的係令你學得更實在、少走冤枉路。
